Ermənistanda qanunsuz olaraq həqiqi hərbi xidmət keçməmiş, xaricdə yaşayan vətəndaşların ölkəyə qayıtması qaydası yumşaldılır. Novator.az-ın məlumatına görə, hökumətin 8 iyun iclasında qanunsuz olaraq həqiqi hərbi xidmət keçməmiş vətəndaşlarla bağlı qanuna dəyişiklik edilib.
Hazırda həqiqi hərbi xidmət keçməmiş vətəndaş hər buraxılan çağırışa görə 200 min dram (420 dollara yaxın) cərimə ödəməlidir. Hökumətin təklif etdiyi yeniliyə əsasən, ölkəyə qayıdıb həqiqi hərbi xidmətə yollanmaq istəyən şəxsin bu barədə ərizəsinə müdafiə naziri yanında komissiya baxacaq, cərimə məbləğini komissiya müəyyən edəcək.
Qanuna edilən başqa bir dəyişiklik həqiqi hərbi xidmət keçməmiş vətəndaşların Ermənistana 2019-cu ilin sonuna kimi qayıtmasını nəzərdə tutur.
Ermənistanda həqiqi hərbi xidmətə 18-27 yaş arası oğlanlar çağırılır.
