Türkiyə: yeni rəy sorğusunun nəticələri
Türkiyənin ORC araşdırma şirkəti iyunun 24-nə təyin olunmuş növbədənkənar prezident və parlament seçkisi ilə bağlı sorğusunun nəticələrini açıqlayıb. Novator.az-ın məlumatına görə, sorğunun mayın 28-dən iyunun 1-dək 37 vilayətdə, 3410 nəfər arasında üzbəsurət keçirildiyi bəyan olunub.
Hakim Ədalət və İnkişaf Partiyasının sədri, dövlət başçısı Rəcəb Teyyub Ərdoğan rəy sorğusunda 53,4%-lə öndə göstərilir.
Cümhuriyyət Xalq Partiyasının namizədi, Böyük Millət Məclisinin deputatı Məhərrəm İncə 23,8%, Yaxşı Partiyanın lideri Maral Akşener 11,5%, Xalqların Demokratik Partiyasından Səlahəddin Dəmirtaş (hazırda həbsdədir) 8,7% nəticə göstərib.
Səadət Partiyasının lideri Təməl Qaramollaoğluna sorğu iştirakçılarının 2,1%-i, Vətən Partiyasının lideri Doğu Perinçekə 0,5%-i dəstək verir.
Parlament seçkisinə Ədalət və İnkişaf Partiyası ilə Milliyyətçi Hərəkat Partiyası Xalq ittifaqı adı altında, Cümhuriyyət Xalq Partiyası, Yaxşı Partiya və Səadət Partiyası Millət ittifaqı adı altında, Xalqların Demokratik Partiyası, Vətən Partiyası və Hür Dava Partiyası ayrı-ayrılıqda gedir.
ORC şirkətinin sorğusuna görə, respondentlərin 52,8%-i Xalq ittifaqına, 35,6%-i Millət ittifaqına, 10,9%-i Xalqların Demokratik Partiyasına, 0,7%-i digər partiyalara dəstək nümayiş etdirib.
