Suriya Gürcüstana müharibə elan edir
Mayın 29-da Suriya rejimi Abxaziya və Cənubi Osetiyanı müstəqil dövlətlər kimi tanıyıb. Novator.az-ın məlumatına görə, qərarı Suriyanın Xarici İşlər Nazirliyi açıqlayıb.
Gürcüstan torpaqları olan Abxaziya və Cənubi Osetiya bölgələri 1990-cı illərin əvvəlindən özünü müstəqil dövlət elan etmiş rejimlərin əlindədir. 2008-ci ildə Rusiya Abxaziya və Cənubi Osetiyanı işğal edərək onları müstəqil dövlətlər kimi tanımaq qərarı verib.
Gürcüstan bu qərarı sərt qarşılayaraq Rusiya ilə diplomatik münasibətləri kəsib, həmçinin Müstəqil Dövlətlər Birliyindən çıxıb.
Nikaraqua, Venesuela, Nauru 2008-ci ildən Abxaziya və Cənubi Osetiyanı müstəqil dövlətlər kimi tanıyır. 2011-ci ildə Vanuatu və Tuvalu da eyni qərarı çıxarıblar, ancaq sonradan bundan geri çəkiliblər.
Suriyada 2011-ci ilin mart ayında Əsəd sülaləsinin hakimiyyətdən getməsi tələbi ilə başlayan xalq hərəkatı sonradan vətəndaş müharibəsinə çevrilib. 2000-ci ildən ölkədə prezident postunu Bəşər Əsəd tutur. 1971-2000-ci illər arasında isə Suriyaya onun atası Hafiz Əsəd prezidentlik edib. Rusiya münaqişədə Əsəd sülaləsinə siyasi, iqtisadi və hərbi dəstək verir.
