Avropanın ən çirkli paytaxtı
Avropa İttifaqının Statistika Xidməti (Eurostat) birliyin ən təmiz paytaxt şəhərlərinin reytinqini açıqlayıb. Novator.az-ın məlumatına görə, Lüksemburq şəhəri sakinlərinin 95%-i paytaxtın təmizliyindən məmnun olduğunu bildirib.
Şəhərin təmizliyindən məmnunluq indeksinə görə ikinci yerdə Avstriyanın paytaxtı Vyana (əhalinin 90%-i təmizlikdən razıdır), üçüncü yerdə Sloveniyanın paytaxtı Lyublyana (88%) qərarlaşıb.
Latviyanın paytaxtı Riqa (81%) və Finlandiyanın paytaxtı Helsinki (80%) ilk beşliyin sonrakı pillələrində yer alıb.
Sonrakı sıralama belədir: Litvanın paytaxtı Vilnüs (78%), Estoniyanın paytaxtı Tallin (76%), Xorvatiyanın paytaxtı Zaqreb (73%), İsveçin paytaxtı Stokholm (71%) və Danimarkanın paytaxtı Kopenhagen (69%).
Eurostat-ın reytinqində İtaliyanın paytaxtı Roma Avropanın ən çirkli şəhəri kimi göstərilib. Roma sakinlərinin yalnız 9%-i paytaxtı kifayət qədər təmiz hesab edir.
Slovakiya paytaxtı Bratislavanın (28%), Bolqarıstan paytaxtı Sofiyanın (29%), Rumıniya paytaxtı Buxarestin (37%), İspaniya paytaxtı Madridin (38%), Macarıstan paytaxtı Budapeştin (39%), Yunanıstan paytaxtı Afinanın (41%), Almaniya paytaxtı Berlinin (45%), Belçika paytaxtı Brüsselin (47%) və Fransa paytaxtı Parisin (49%) sakinlərinin əksəriyyəti şəhərlərini təmizlik sarıdan mənfi qiymətləndirir.
Səidə Hüseynova
