İş və işsizlik rəqəmləri
2018-ci il mayın 1-nə Azərbaycanda iqtisadi fəal əhalinin sayı 5 milyon 83,3 min nəfər olub, onların 4 milyon 830,6 min nəfərini məşğul əhali təşkil edib. Dövlət Statistika Komitəsi belə hesabat yayıb.
Novator.az-ın məlumatına görə, hesabatda bildirilir ki, aprelin 1-nə muzdla işləyənlərin 33,6 min nəfəri iqtisadiyyatın neft sektorunda, 1 milyon 498,7 min nəfəri qeyri-neft sektorunda çalışıb.
Birinci rübün sonuna ölkə ərazisində haqqı ödənilən əmək fəaliyyəti ilə məşğul olan əcnəbilərin və vətəndaşlığı olmayan şəxslərin sayı 872 nəfər göstərilir. Onlardan 32,9 faizi tikintidə, 30 faizi mədən sənayesində, 8 faizi emal sənayesində, 6,4 faizi ticarət; nəqliyyat vasitələrinin təmiri, 5,3 faizi turistlərin yerləşdirilməsi və ictimai iaşə, 3,6 faizi təhsil sahələrində məşğul olub.
Mayın 1-nə məşğulluq xidməti orqanlarında 37,1 min nəfər rəsmi işsiz statusu alıb. İşsizlik müavinətinin və işsizlikdən sığorta ödənişinin orta məbləği 354,2 manat olub.
2018-ci ilin birinci rübü ərzində ölkədə 11,5 min iş yeri bağlanıb.
