![]({"full":{"0":"2017\/05\/QMI.jpg","1":538,"2":381,"3":false,"file":"https:\/\/novator.az\/wp-content\/uploads\/2017\/05\/QMI.jpg"}})
Ramazan ayı: günlər və fitrə zəkatının məbləği açıqlandı
- 15 May 2018
- comments
- Novator.az
- Posted in ŞərhXəbər
Qafqaz Müsəlmanları İdarəsinin Qazılar Şurası Ramazan ayının başlanması ilə bağlı fətva verib.
Novator.az-ın məlumatına görə, fətvada deyilir ki, Azərbaycan Milli Elmlər Akademiyasının Şamaxı Astrofizika Rəsədxanasının hesablamasına görə, Ramazan ayının 1-i may ayının 17-nə düşür. Həmin gün Ay göründüyü andan Ramazan ayı başlanır. Mayın 16-dan 17-nə keçən gecə isə niyyət gecəsidir.
Qafqaz Müsəlmanları İdarəsi Şamaxı Astrofizika Rəsədxanası ilə birgə Ramazan ayında namaz vaxtlarını, eləcə də bayram tarixini müəyyənləşdirən xüsusi təqvim də tərtib edib.
Qafqaz Müsəlmanları İdarəsinin Qazılar Şurası və Elmi-Dini Şurası bildirir ki, digər mənbələrdən əldə edilən, təxribat və təfriqə xarakteri daşıyan, habelə məzhəb və vaxt ayrı-seçkiliyi yaradan təqvimlərin dindarlar tərəfindən istifadəsi yolverilməzdir, din xadimləri belə halların qarşını almağa məsuldurlar: “Ümid edirik ki, Dini Qurumlarla İş üzrə Dövlət Komitəsi və yerli icra hakimiyyətlərinin müvafiq qurumları da bu məsələdə bizə kömək edəcək, məhz Qafqaz Müsəlmanları İdarəsinin tərtib etdiyi təqvimin kütləvi informasiya vasitələri və sosial mediada təbliğinə, yayılmasına nəzarət edəcəklər”.
Təqvimə əsasən, Ramazan bayramı (Şəvval ayının 1-i) iyunun 15-nə düşür.
Orucun mühüm əməllərindən biri olan fitrə zəkatının vaxtı Ramazan ayının son günüdür. Fitrə canın sədəqəsi sayılır və imkanı olan müsəlman ailəsinin hər bir üzvü üçün fitrə zəkatı çıxarıb imkansızlara, ehtiyaclı ailələrə verməyə mükəlləfdir. Qazılar Şurası adambaşına 5-10 manat arası fitrə zəkatı verilməsini məsləhət görür.
Qazılar Şurası və Elmi-Dini Şura din xadimlərinə xatırladır ki, Ramazan ayı ərzində iftar vaxtından qabaq açılan süfrələrdə iştirak etmək günahdır: “Xəbərdarlığımızı nəzərə almayanlar barəsində ciddi tədbirlər görüləcək”.
Qazılar Şurası tövsiyə edir ki, bu əziz günlərdə dinimizdə müqəddəs sayılan şəxslərlə yanaşı Vətənimiz və torpaqlarımız naminə canlarından keçən şəhidlərimizin də xatirəsi yad edilsin, ruhlarına dualar oxunsun, xütbə və moizələrdə vətənpərvərlik hisslərinin təbliğinə xüsusi diqqət yetirilsin.