Bir ildə Ermənistan nə qədər əhali itirib?
2017-ci ildə Ermənistan əhalisi 13 min 400 nəfər azalıb. Novator.az bildirir ki, Milli Statistika Xidməti belə hesabat yayıb.
Rəsmi açıqlamaya əsasən, ötən il paytaxt Yerevanda əhalinin sayı 1800 nəfər artıb, amma bölgələrdə azalma qeydə alınıb. Əhalisini ən çox itirən bölgələr Şirak və Lori vilayətləridir. Bu vilayətlərin hər birini 4 min nəfərə yaxın sakin tərk edib.
Əhali sayına görə Ermənistanın ikinci və üçüncü şəhərləri Gümrü və Vanadzorun hər biri ötən il 1500 nəfərə yaxın sakin itirib.
Hesabatda 2017-ci ildə ölənlərə nisbətdə doğulanların sayının 10 min 300 nəfər çox olduğu vurğulanır. Ancaq əhali 13 min nəfər azalıb. Çünki il ərzində 23 min nəfər mühacirət edib. Bu isə ayrı-ayrılıqda İcevan, Artaşat və Gorusun əhalisindən çoxdur.
2018-ci il aprelin 1-nə ölkə əhalisinin sayı ötən ilin eyni dövrü ilə müqayisədə 11,6 min nəfər azalıb.
Rəsmi hesabata əsasən, aprelin 1-nə Ermənistanın 2 milyon 969,9 min nəfər əhalisi var.
İlin əvvəlindən Ermənistanda əhalinin sayı 2,8 min nəfər azalıb.
Yanvar-mart aylarında ölkədə doğum da geriləyib. Ötən ilin ilk rübü ilə müqayisədə doğum 3,6% aşağı düşüb.
Səidə Hüseynova
