Autizm sindromlu yeniyetmələrin çalışdığı kafedə görüş
Mayın 2-də bir qrup dövlət, vətəndaş cəmiyyəti və media nümayəndəsi “Kaşalata Kafe”də toplanıb.
“Kaşalata Kafe” Azərbaycanda autizm sindromlu uşaqlara peşə öyrədilməsi məqsədilə fəaliyyət göstərən yeganə atelyedir.
Burada görüş Avropa İttifaqının maliyyələşdirdiyi, BMT-nin İnkişaf Proqramı tərəfindən icra olunan “Əhalinin həssas qruplarının sosial-iqtisadi hüquqlarının təmin olunmasında vətəndaş cəmiyyətinin rolunun gücləndirilməsi” layihəsi çərçivəsində, “İnternyus Azərbaycan” təşkilatının təşəbbüsü ilə təşkil edilib.
Görüşün məqsədi xüsusi qayğıya ehtiyac duyan autizm sindromlu yeniyetmələrin iş bacarıqlarının sərgiləndiyi yeganə məkanı – “Kaşalata Kafe”ni ictimaiyyətə tanıtmaq və vətəndaş cəmiyyətinin diqqətini autizmli uşaqlara yönəltmək olub.
Autizmli yeniyetmələrin hazırldığı şirniyyatların süfrəyə düzüldyü tədbirdə Milli Məclisin sosial siyasət komitəsinin üzvü deputat İlham Məmmədov, Ombudsman Aparatının sektor müdiri Müqalib Mahmudov, Ailə, Qadın və Uşaq Problemləri üzrə Dövlət Komitəsinin nümayəndəsi Aidə Ələkbərova, vətəndaş cəmiyyəti və media nümayəndələri qatılıblar.
Tədbirə dəstək verən “Mado Azərbaycan” restoranlar şəbəkəsi və “Papa John’s” pizza şəbəkəsi autizm sindiromlu yeniyetmələrə hədiyyələr təqdim edərək onlara məxsusi təcrübə proqramlarında iştirak təklif ediblər.
“Birgə və Sağlam” İctimai Birliyinin üç illik layihəsi kimi fəaliyyət göstərən “Kaşalata Kafe” atelyesində autizm sindromlu yeniyetmələr müəllimlərin nəzarəti ilə xüsusi fəaliyyət cədvəlləri əsasında peşə təlimi keçir, iş öyrənir, gördükləri işdən zövq alır, yeni kəşflər edir, yeni insanlarla tanış olurlar.
