İlk rübün qəza statistikası
Dövlət Statistika Komitəsi bu ilin ilk rübünün yol-nəqliyyat hadisələri barədə hesabat yayıb. Novator.az bildirir ki, rəsmi açıqlamaya görə, yanvar-mart aylarında ölkədə 376 və ya 2017-ci ilin ilk rübü ilə müqayisədə 7,6 faiz az yol-nəqliyyat hadisəsi baş verib, zərər çəkən şəxslərin sayı 11,9 faiz azalaraq 505 nəfərə düşüb, 162 nəfər ölüb, 343 nəfər yaralanıb.
Yol-nəqliyyat hadisələrinin 53,2 faizi nəqliyyat vasitələrinin və piyadaların, 31,1 faizi bir neçə nəqliyyat vasitəsinin, 15,7 faizi bir nəqliyyat vasitəsinin iştirakı ilə baş verib.
Qəzalarda həlak olanların 80,9 faizi kişilərdir.
Nəqliyyat vasitələrinin sərxoş vəziyyətdə idarə olunması səbəbindən ölümlə və ya bədən xəsarəti alınması ilə nəticələnən 11 hadisə baş verib, 8 nəfər həyatını itirib.
Yanvar-mart aylarında yol hərəkəti qaydaları əleyhinə aşkarlanmış inzibati xətaların sayı 2017-ci ilin müvafiq dövrünə nisbətən 5,1 faiz artaraq 786,2 minə çatıb. Qaydaların pozulmasına görə 14,2 milyon manat məbləğində cərimələr tətbiq edilib.
