Nazirlər Kabinetinin rəsmi portalı Cabmin.gov.az-da dəyişikliklər edilib. Novator.az-ın məlumatına görə, yeniliklər aprelin 21-də Novruz Məmmədov baş nazir təyin olunandan sonra tətbiq edilib.

Novruz Məmmədov 1997-ci ildən Prezident Administrasiyasının xarici əlaqələr şöbəsinin müdiri idi. O, baş nazir fəaliyyətinə başlayandan Cabmin.gov.az-da Azərbaycan, Rəhbərlik, Nazirlər Kabineti, Nazirlər Kabinetinin Aparatı, Vətəndaşların müraciətləri adlı yeni bölmələr yaradılıb.

Azərbaycan bölməsində tarixi arayış verilib, konstitusiyanın mətni yerləşdirilib, dövlət rəmzləri, ərazi məsələləri haqda bilgilər yer alıb.

Rəhbərlik bölməsində baş nazirin və onun müavinlərinin bioqrafiyası yerləşdirilib.

Nazirlər Kabineti bölməsində status, səlahiyyətlər, iş qaydası haqqında bilgilər var. Bu bölmədə həmçinin Nazirlər Kabinetinin tərkibi ilə tanış olmaq və mərkəzi icra hakimiyyəti orqanlarının saytlarına giriş etmək mümkündür.

Vətəndaşların müraciətləri bölməsində Nazirlər Kabinetində qəbul günləri yer alıb, qəbula yazılmaq və müraciət etmək imkanları yaradılıb.

Sənədlər bölümündə Nazirlər Kabinetinin qərarları ilə tanış olmaq mümkündür.

Prezidentin yuxarı icra orqanı olan Nazirlər Kabinetinin tərkibinə baş nazir, onun müavinləri, nazirlər və başqa mərkəzi icra hakimiyyəti orqanlarının rəhbərləri daxildir. Qurumun əsas səlahiyyətləri dövlət büdcəsinin hazırlanması və icrası, maliyyə-kredit və pul siyasətinin, dövlət iqtisadi və sosial proqramlarının həyata keçirilməsi, nazirliklərə və digər mərkəzi icra hakimiyyəti orqanlarına rəhbərlikdir.

Yeni Nazirlər Kabineti 18 nazirlikdən, həmçinin komitə, xidmət və agentliklərdən ibarətdir.