Ermənistanın etirazı
Novator.az Ermənistanın paytaxtı Yerevanda və ölkənin başqa bölgələrində mayın 2-də çəkilmiş fotoları təqdim edir.
Müxalifət lideri Nikol Paşinyanın çağırışına qoşulan aksiyaçılar mayın 2-də paytaxtın mərkəzi küçələrini, eləcə də ölkənin avtomobil yollarının, dəmiryolu xətlərinin çoxunu bağlayıb. Paytaxtda aeroport, metro iflic edilib.
Aksiyaçılar Nikol Paşinyanın baş nazir seçilməsinin əngəllənməsinə etiraz edirlər. Mayın 1-i parlamentdə keçirilən səsvermədə müxalif siyasətçi 45 səs toplayıb. Baş nazir kürsüsünə oturmaq üçün 105 nəfərlik parlamentdə 53 səs almaq gərəkdir.
Yeganə namizəd olan Nikol Paşinyanın qarşısını sabiq baş nazir Serj Sərkisyanın sədrlik etdiyi hakim Respublika Partiyası kəsib. Bu qurumun deputatları 1 may səsverməsində Nikol Paşinyana dəstəkdən boyun qaçırıb.
Baş nazir seçkisinin ikinci turu mayın 8-də olacaq. Həmin gün hökumət başçısını seçmək mümkün olmasa, parlament buraxılmalı, növbədənkənar seçki keçirilməlidır.
Vətəndaş Sazişi Partiyasının sədri, parlamentdəki “Çıxış” blokunun lideri olan Nikol Paşinyan aprelin 13-dən Serj Sərkisyanın baş nazir olmaq niyyətinə qarşı aksiyalar təşkil edib. 2008-ci ildən Ermənistan prezidenti olmuş Serj Sərkisyan aprelin 17-də baş nazir kürsüsünə oturub, ancaq xalq etirazlarına görə aprelin 23-də istefa verib. Onun istefasından sonra Ermənistan hökumətinə baş nazirin birinci müavini Karen Karapetyan müvəqqəti rəhbərlik edir. Karen Karapetyan Respublika Partiyası sədrinin birinci müavinidir.
Serj Sərkisyanın süqutundan sonra da aksiyalar səngimir. Nikol Paşinyan hakimiyyətin ona təhvil verilməsini, milli etimad hökumətinin qurulmasını istəyir.
