Gecələmələr 24 faiz çoxalıb
2018-ci ilin birinci rübündə Azərbaycanın mehmanxanalarında 586 min gecələmə keçirilib, bu da ötən ilin ilk üç ayı ilə müqayisədə 24 faiz çoxdur. Novator.az-ın məlumatına görə, Dövlət Statistika Komitəsi bildirir ki, gecələmələrin 58 faizi Bakıda, 9,7 faizi Qəbələdə, 8,6 faizi Qusarda, 4,8 faizi Naftalanda, 3,8 faizi Naxçıvan Muxtar Respublikasında, 3,7 faizi Qubada, 1 faizi Gəncədə, qalan hissəsi digər bölgələrdəki mehmanxanalarda qeydə alınıb.
Əcnəbilər və vətəndaşlığı olmayan 439,8 min nəfər üç ayda Azərbaycan mehmanxanalarında gecələmə keçirib, bu da ümumi gecələmələrin 75,1 faizini təşkil edir. Gecələmələrin 18,3 faizi Birləşmiş Ərəb Əmirlikləri, 14 faizi Rusiya, 9,4 faizi İran, 4,9 faizi Türkiyə, 4,4 faizi ABŞ, 3,7 faizi Qətər, 3,3 faizi Böyük Britaniya, 3,1 faizi Küveyt, 1,6 faizi Ukrayna, 1,5 faizi Almaniya vətəndaşlarının, qalanı digər ölkələrin vətəndaşlarının payına düşüb.
Yanvar-mart aylarında mehmanxanaların gəlirləri 73,1 milyon manat olub.
Mehmanxanaların nömrə fondundan istifadə səviyyəsinin orta göstəricisi ölkə üzrə 20 faiz təşkil edib.
