Donald Tramp İlham Əliyevə nə yazır?
Amerika Birləşmiş Ştatlarının prezidenti Donald Tramp Azərbaycanın dövlət başçısı İlham Əliyevə məktub göndərib. Məktubda deyilir: “Hörmətli cənab prezident, mən Amerika və Azərbaycan xalqları üçün qarşılıqlı maraq doğuran bir çox sahələrdə Sizinlə birgə işləmək əzmindəyəm.
Biz Sizinlə birlikdə terrorçuluğun məğlub edilməsində, yeni iş yerlərinin yaradılmasında və Avropanın enerji təhlükəsizliyinin yaxşılaşdırılmasında tərəqqi əldə edə bilərik. Korrupsiyaya qarşı mübarizədə və Dağlıq Qarabağ münaqişəsinin sülh yolu ilə həllində irəliləyiş bu səylərə töhfə verəcək. Sizə və Azərbaycan xalqına ən xoş arzularımı bildirirəm”.
Novator.az xatırladır ki, İlham Əliyev aprelin 11-də keçirilmiş prezident seçkisində yenidən dövlət başçısı seçilib, aprelin 18-də səlahiyyətlərinin icrasına başlayıb.
56 yaşlı İlham Əliyev 1994-cü ildən Azərbaycanda rəhbər vəzifələr tutur. Azərbaycan Dövlət Neft Şirkətinin vitse-prezidenti, birinci vitse-prezidenti (eyni zamanda Milli Məclisin deputatı), baş nazir olub. 2003-cü il oktyabrın 15-də, 2008-ci il oktyabrın 15-də və 2013-cü il oktyabrın 9-da prezident seçilib.
2016-cı ildə konstitusiyaya edilmiş dəyişikliklə prezidentlik müddəti 5 ildən 7 ilə qaldırılıb.
