Cəbhəçi şair faciəli şəkildə həlak olub
AXCP üzvü, şair Araz Səməd faciəli şəkildə həlak olub.
APA-nın məlumatına görə, Araz Səmədi aprelin 18-i saat 23 radələrində Abşeron rayonunun Digah qəsəbəsində yolu keçərkən avtomobil vurub. “İsuzu” markalı sərnişin avtobusunu Mehdiabad qəsəbə sakini Aydın Kərimov idarə edirmiş. Araz Səməd hadisə yerində keçinib.
Daxili İşlər Nazirliyinin mətbuat xidmətindən APA-ya bildiriblər ki, Abşeron Rayon Polis İdarəsində araşdırma aparılır.
Araz Səməd 1975-ci ildə Şəkidə doğulub, həmin rayonun sakini idi.
Şair Rauf Qərib Alagözün Kulis.az-a dediyinə görə, Araz Səməd Bakıya iş axtarmağa gəlibmiş.
Azadliq.info bildirir ki, Araz Səməd vətənpərvər, əqidəli, mübariz bir insan idi və həyatını Azərbaycanın demokratikləşməsi uğrunda mübarizəyə həsr etmişdi.
Azadliq.info bu günlərdə Araz Səmədin “Facebook” şəbəkəsindəki profilinin kodlarının qanunsuz ələ keçirildiyini vә onun adından təxribat xarakterli bәzi qeydlәrin paylaşıldığını da xəbər verir.
Araz Səmədin ölüm xəbərindən sonra AXCP üzvü Təzəxan Mirələmli sosial şəbəkədə yazıb: “Araz Səmədin “Facebook” profili aprelin 17-si saat 16:30 radələrində oğurlanmış, AXCP əleyhinə status paylanmışdı. Mənə müraciət edib profilin qaytarılmasına kömək etməyimi istədi. Onun necə depressiyaya düşdüyünün şahidiyəm. Sarsıntı keçirdiyini bildirdi. Dediyinə görə, bütün yaradıcılığı “Facebook” səhifəsindədir. Aprelin 18-i yenidən mənə zəng edib profilin aqibəti ilə maraqlandı. “Narahat olma, qaytararlar” dedim”.
Allah rəhmət eləsin!
