Milli Şura və Müsavat Partiyası aprelin 14-nə mitinq təyin edib.

Bastainfo.com-un məlumatına görə, Müsavatın və Milli Şuranın  təmsilçiləri mitinqlə bağlı xəbərdarlıq məktubu Bakı Şəhər İcra Hakimiyyətinə təqdim olunub.

Aksiyanı paytaxtın Yasamal rayonundakı İdman-Sağlamlıq Kompleksinin stadionunda (“İnşaatçılar” metro stansiyasının yanı) keçirmək nəzərdə tutulur.

Milli Şura və Müsavat Partiyası bu il martın 10-da və 31-də həmin stadionda mitinq keçirib.

11 aprel növbədənkənar prezident seçkisi ərəfəsində keçirilən bu mitinqlərin əsas şüarları “Azad seçki!”, “Korrupsiyaya yox!”, “Monarxiyaya yox!”, “Siyasi məhbuslara azadlıq!” olub. 31 mart mitinqi Bakıda ermənilərin törətdiyi mart qırğınının 100 illiyinə təsadüf etdiyindən həmin gün təşkilatçılar aksiyada erməni terroru əleyhinə də şüarlar səsləndiriblər.

Aprelin 14-nə təyin edilmiş mitinqdə əsasən seçki saxtakarlıqlarına etiraz bildirmək planlaşdırılır.