Qara siyahıda 707 nəfər var
Azərbaycan Xarici İşlər Nazirliyinin arzuolunmaz şəxslər siyahısı sonuncu dəfə bu il fevralın 28-də yenilənib. Novator.az bildirir ki, həmin siyahıda 707 nəfərin adı var. İlin əvvəlində qara siyahıda 698 nəfərin adı yer alırdı.
Xarici İşlər Nazirliyi işğal altındakı ərazilərə qanunsuz səfər etmiş əcnəbilərin adlarını qara siyahıya salır, onların Azərbaycana səfərini yasaqlayır.
Ermənistan Azərbaycanın Dağlıq Qarabağ vilayətini və onun ətrafındakı Laçın, Kəlbəcər, Qubadlı, Zəngilan, Ağdam, Füzuli, Cəbrayıl rayonlarını, eləcə də Qazax rayonunun 7, Naxçıvan Muxtar Respublikasının 1 kəndini işğal edib.
Dağlıq Qarabağ münaqişəsinin dinc yolla tənzimləməsi üçün 1992-ci ildə yaradılan ATƏT-in Minsk qrupunda Azərbaycan və Ermənistanla yanaşı Rusiya, Fransa, ABŞ, Belarus, Almaniya, İtaliya, İsveç, Finlandiya, Türkiyə təmsil olunur.
Qara siyahıda Minsk qrupu ölkələrindən yalnız Finlandiyanın heç bir vətəndaşının adı yoxdur. Türkiyənin 8 vətəndaşının adı arzuolunmaz şəxslər siyahısına daxil edilib.
