Gürcüstana ən çox bizdən gedirlər
2018-ci ilin mart ayında Gürcüstana 578 min 500 əcnəbi səfər edib. Bu, 2017-ci ilin eyni dövrü ilə müqayisədə 67 min 400 nəfər çoxdur. Novator.az-ın məlumatına görə, Milli Turizm Administrasiyası aprelin 3-də belə açıqlama yayıb.
Rəsmi hesabata əsasən, martda turistlərin sayı 33%, beynəlxalq ziyarətçilərin sayı 13,2% artıb.
Mart ayında Gürcüstana ən çox Azərbaycandan (133 min 400 nəfər) ziyarətçi gedib. İkinci yerdə Ermənistan vətəndaşları (109 min 300 min nəfər), üçüncü yerdə Türkiyə vətəndaşları (100 min 700 nəfər) gəlir.
Ziyarətçi sayına görə sonrakı pillələrdə Rusiya vətəndaşları (91 min 500 nəfər) və İran vətəndaşları (58 min 800) qərarlaşır.
Mart ayında Avropa İttifaqından Gürcüstana ən çox Böyük Britaniya, Almaniya, Latviya, Litva və Fransadan gediblər.
İsrail, Çin, İran, Hindistan və ABŞ-dan səfər edənlərin sayında xüsusi artım olduğu da bildirilir.
2018-ci ilin ilk 3 ayında isə Gürcüstana 1 milyon 563 min 500 beynəlxalq ziyarətçi səfər edib. Bu, 2017-ci ilin müvafiq dövrü ilə müqayisədə 196 min 500 nəfər artım deməkdir.
Səidə Hüseynova
