Övladlığa götürmə hesabatı
Uşaqların övladlığa götürülməsi haqqında statistika açıqlanıb. Novator.az bildirir ki, Ədliyyə Nazirliyinin məlumatına əsasən, 2017-ci ildə 877 uşaq övladlığa götürülüb, bu da 2016-cı illə müqayisədə 13,5 faiz çoxdur. Əvvəlki ilə nisbətən övladlığa götürülən oğlanların sayı 15,9 faiz artaraq 466 nəfər, qızların sayı isə 10,8 faiz artaraq 411 nəfər olub.
2017-ci ildə əvvəlki illə müqayisədə övladlığa götürülmüş 3 yaşa qədər olan uşaqlarda 19,7 faiz, 3-5 yaşlı uşaqlarda 7,5 faiz, 6-10 yaşlı uşaqlarda 9,9 faiz, 11-17 yaşlı uşaqlarda isə 7,3 faiz artım qeydə alınıb.
Əcnəbilər və vətəndaşlığı olmayan şəxslər ötən il 28 uşaq övladlığa götürüb. Onların 12-si qızdır.
2017-ci ildə övladlığa götürülməsi barədə ləğv edilmiş qərarların sayı əvvəlki illə müqayisədə 7,9 faiz azalaraq 58-ə düşüb.
Demoqrafik vəziyyətlə bağlı son rəsmi hesabata görə, 2018-ci il fevralın 1-nə ölkə əhalisinin sayı 9 milyon 904 min 850 nəfərə çatıb. İlin əvvəlindən əhali 6765 nəfər artıb.
Əhalinin 49,9 faizi kişilər, 50,1 faizi qadınlardır. Hər 1000 kişiyə 1004 qadın düşür.
Yanvar ayında Ədliyyə Nazirliyinin qeydiyyat şöbələri 11938 doğulan körpə qeydə alıb. Doğulan körpələrin 52,9 faizi oğlan, 47,1 faizi qızdır.
