Dövlət Statistika Komitəsi turizm hesabatı yayıb. Novator.az-ın məlumatına görə, hesabatda qeyd olunur ki, 2018-ci ilin yanvar-fevral aylarında Azərbaycana 139 ölkədən 352,5 min nəfər (ötən ilin ilk iki ayı ilə müqayisədə 12,1 faiz çox) əcnəbi və vətəndaşlığı olmayan şəxs gəlib. Gələnlərin 29,3 faizi Rusiya, 24,9 faizi Gürcüstan, 13,8 faizi Türkiyə, 8 faizi İran, 3,7 faizi Birləşmiş Ərəb Əmirlikləri, 2,1 faizi Ukrayna, 2 faizi İraq, 16,1 faizi digər ölkələrin vətəndaşları, 0,1 faizi vətəndaşlığı olmayan şəxslərdir.

İran istisna olunmaqla Körfəz ölkələrindən gələnlərin sayında daha çox artım var. Ötən ilin yanvar-fevral ayları ilə müqayisədə Azərbaycana gələn Küveyt vətəndaşlarının sayı 6 dəfə, Qətər vətəndaşlarının sayı 2,6 dəfə, Bəhreyn vətəndaşlarının sayı 2,5 dəfə, Səudiyyə Ərəbistanı vətəndaşlarının sayı 2,5 dəfə, Oman vətəndaşlarının sayı 1,8 dəfə, İraq vətəndaşlarının sayı 1,7 dəfə, Birləşmiş Ərəb Əmirlikləri vətəndaşlarının sayı 1,3 dəfə artıb.

İrandan gələnlərin sayında 26,7 faiz azalma qeydə alınıb.

Avropa İttifaqı ölkələrindən gələnlərin sayı ötən ilin yanvar-fevral aylarında gələnlərin sayına bərabər olub:11,3 min nəfər.

MDB ölkələrindən gələnlərin sayı 4,6 faiz artaraq 123 min nəfərə çatıb.

2018-ci ilin yanvar-fevral aylarında xarici ölkələrə gedən Azərbaycan vətəndaşlarının sayı əvvəlki ilin eyni dövrü ilə müqayisədə 3,6 faiz azalaraq 583 min nəfər olub. Ölkə vətəndaşlarının 32 faizi Gürcüstana, 26 faizi İrana, 22,4 faizi Rusiyaya, 12,6 faizi Türkiyəyə, 1,9 faizi Ukraynaya, 1,4 faizi Birləşmiş Ərəb Əmirliklərinə, 3,7 faizi isə digər ölkələrə səfər edib.