Kimin adı populyardır?
Aprelin 11-də keçiriləcək prezident seçkisində namizəd olan şəxslərin adları nə dərəcədə populyardır?
Prezidentliyə dövlət başçısı İlham Əliyevlə yanaşı siyasətçilər Araz Əlizadə, Qüdrət Həsənquliyev, Zahid Oruc, Fərəc Quliyev, Hafiz Hacıyev, Sərdar Cəlaloğlu və Razi Nurullayev namizəddirlər.
Novator.az Ədliyyə Nazirliyinin rəsmi saytına nəzər salaraq müəyyən edib ki, bu il Azərbaycanda doğulmuş 18 nəfərə İlham adı qoyulub. Son beş ildə, 2014-cü ildən bəri 618 nəfər İlham adı alıb.
Zahid adı bu il 11 nəfərə, son beş ildə 285 nəfərə verilib.
2018-ci ildə Araz adı 10 nəfərə, son beş ildə 278 nəfərə qoyulub.
Sərdar və Fərəc adlarının hər birini 2018-ci ildə 5 nəfər alıb, amma son beş ilin göstəricisində Sərdar adı (233 nəfər) Fərəc adından (67 nəfər) üstündür.
Hafiz adı bu il 4 nəfərə, son beş ildə 120 nəfərə qoyulub.
2018-ci ildə Qüdrət adı 1 nəfərə, 2014-cü ildən bəri 105 nəfərə verilib.
Razi adını 2018-ci ildə heç kim almayıb. 2014-cü ildən bəri isə bu ad 19 nəfərə qoyulub.
