Avropada iki günlük istirahət neçəyədir?
“Post Office Travel Money” maliyyə şirkəti bu yaz dincəlməyin ən ucuz başa gəldiyi Avropa şəhərlərinin siyahısını açıqlayıb. Novator.az-ın məlumatına görə, siyahıya Polşanın Krakov şəhəri başçılıq edir.
Reytinq Avropanın 36 şəhərində turistlər üçün populyar xidmət və malların dəyəri əsasında tərtib olunub, bir fincan qəhvə, bir şüşə pivə, bir şüşə şərab daxil olmaqla iki nəfərlik yaxşı nahar, ictimai nəqliyyatda gediş haqqı, habelə üç ulduzlu oteldə iki gün qalmağın qiymətləri nəzərə alınıb.
Hesablama göstərib ki, Krakovda iki istirahət günü turistə təqribən 164 funt sterlinqə başa gələr.
Litvanın paytaxtı Vilnüsdə iki gün dincəlmək üçün 165 funt, Latviyanın paytaxtı Riqada 172 funt lazımdır.
Reytinq cədvəlində sonrakı yerlərdə Polşanın paytaxtı Varşava (180 funt), Macarıstanın paytaxtı Budapeşt (183 funt), Rusiyanın paytaxtı Moskva, Çexiyanın paytaxtı Praqa (199 funt), Yunanıstanın paytaxtı Afina (200 funt), Portuqaliyanın paytaxtı Lissabon, Fransanın Lill şəhəri (208 funt) qərarlaşır.
Almaniyanın paytaxtı Berlində turistin iki günlük istirahəti 282 funta, İtaliyanın paytaxtı Romada 281 funtadır.
1 ingilis funt sterlinqi 2 manat 41 qəpikdir.
Səidə Hüseynova
