Demokratik Qüvvələrin Milli Şurası və Müsavat Partiyası martın 31-i Bakıda mitinq keçirəcək. AXCP sədri, Milli Şuranın Koordinasiya Mərkəzinin üzvü Əli Kərimli aksiyanın Yasamal rayonundakı İdman-Sağlamlıq Kompleksinin stadionuna (“İnşaatçılar” metro stansiyasının yanı) təyin olunduğunu açıqlayıb: “Xalqımıza güvənərək mitinqləri davam etdirmək qərarı verdik. Növbəti mitinqimizdə, martın 31-də “Azad seçki!”, “Korrupsiyaya yox!”, “Monarxiyaya yox!”, “Siyasi məhbuslara azadlıq!” tələb edəcəyik.

Növbəti mitinqimiz həm də Bakıda ermənilərin törətdiyi mart qırğınının 100 illiyinə təsadüf edir. Biz bu mitinqdə “Erməni terrorunu lənətləyirik!”, “Beynəlxalq ictimaiyyət ermənilərin azərbaycanlılara qarşı soyqırımına hüquqi-siyasi qiymət versin!” tələblərini də irəli sürəcəyik. Hər birinizi ümumxalq mitinqinə dəvət edirik! Mitinqə hamılıqla gəlin ki, dünya da, Azərbaycandakı rejim də səsimizi eşitsin”.

Demokratik Qüvvələrin Milli Şurası və Müsavat Partiyası başda olmaqla bir neçə müxalif qurum martın 10-da Yasamaldakı stadionda mitinq keçirib. Aksiyada siyasi və sosial tələblər qoyulub, prezident seçkisinin oktyabrın 17-dən aprelin 11-nə çəkilməsinə etiraz bildirilib. Bakı Şəhər İcra Hakimiyyətinin sanksiyalaşdırdığı 10 mart mitinqi saat 15-dən 17-dək davam edib.

31 mart mitinqini də saat 15-dən 17-dək keçirmək nəzərdə tutulur.