Pərdələri çəkin, telefonu üzü aşağı çevirin – alimlər məsləhət görür
Hətta zəif işıq da insanın yuxu rejimini tənzimləyən bioloji ritmlərə mənfi təsir göstərir.
Belə bioloji ritmlərə “bioloji saat”, “daxili saat” da deyirlər. Həmin ritmlər təbii surətdə insana yatmaq və oyanmaq vaxtının çatdığını xəbər verir.
Novator.az-ın məlumatına görə, yapon alimlərin apardığı tədqiqat göstərib ki, zil qaranlıqda yatmaq adamın əsəbinə müsbət təsir edir, insanı depressiyadan qoruyur. İşıq düşən yerdə, hətta çox zəif işıq olan yerdə yatanda isə insanda depressiya əlamətləri baş qaldırır.
Tədqiqatı Yaponiyanın Nara Tibb Universitetinin alimləri aparıblar. Araşdırma zamanı orta yaşı 72 yaş həddində olan 863 nəfərin sağlamlığı və yuxu tərzi, onların yataq otaqlarının gecələr nə dərəcədə qaranlıq olub-olmaması öyrənilib.
Tədqiqat göstərib ki, zil qaranlıqda yatan, depressiyası olmayan insanların yataq otağına çox zəif işıq düşəndə belə depressiyaya məruz qalma riski artır.
Ona görə də alimlər yatanda pəncərələri pərdələməyi və mobil telefonun ekranını üzü aşağı çevirməyi məsləhət görürlər.
Səidə Hüseynova
