Başqa ölkəyə köçərsiniz? Sorğunun nəticələri
“İPM Research” marketinq-məsləhət şirkəti Qafqazda keçirdiyi sorğunun nəticələrini açıqlayıb.
1995-ci ildə yaradılmış bu şirkət Azərbaycan, Ermənistan, Moldova, Belarus və digər ölkələrdə fəaliyyət göstərir.
Şirkətin Azərbaycan, Gürcüstan, Ermənistan və Rusiyada keçirdiyi yeni sorğuya hər ölkədən 1200 adam cəlb olunub. Respondentlər “Başqa ölkəyə həmişəlik köçərsinizmi” sualını cavablandırıb.
Novator.az bildirir ki, sorğunun nəticələrinə görə, azərbaycanlı respondentlərin 78%-i başqa ölkəyə köçməyə qarşı çıxıb, vətəndə qalmaq istədiyini bildirib.
Gürcülərin 60%-i, ermənilərin və rusların hər birinin 47%-i ölkəsini tərk etmək istəmədiyini deyib.
Ermənistanda başqa ölkəyə köçməyi arzulayan şəxslərin 12%-i Rusiyaya, 11%-i ABŞ-a getmək istədiyini vurğulayıb.
Gürcüstanlı respondentlərin 5%-i yaşamaq üçün Almaniya və ABŞ-a köçməyi arzulayıb.
Rusiyalıların 6%-i Almaniyaya köçmək istədiyini bildirib.
Xaricə köçməyi arzulayan azərbaycanlı respondentlərin 4%-i yaşamaq üçün Rusiya və Türkiyəyə üstünlük verdiyini açıqlayıb.
Səidə Hüseynova
