Harda toplaşmaq olar? Ölkə üzrə siyahı açıqlandı
11 aprel prezident seçkisi ərəfəsində ölkədə sərbəst toplaşmaq üçün müəyyən edilmiş açıq və qapalı yerlərin siyahısı açıqlanıb.
Novator.az xəbər verir ki, siyahıda paytaxtın 12 rayonunda və digər 64 şəhər və rayonda ayrılmış yerlər əksini tapır.
Azərbaycanda növbəti prezident seçkisi bu il oktyabrın 17-də keçirilməli idi. Fevralın 5-də imzalanan prezident sərəncamı ilə aprelin 11-nə növbədənkənar seçki təyin olunub.
MSK indiyədək 7 nəfərin prezidentliyə namizədliyini qeydə alıb: Yeni Azərbaycan Partiyasından dövlət başçısı İlham Əliyev, Sosial Demokrat Partiyasından deputat Araz Əlizadə, Bütöv Azərbaycan Xalq Cəbhəsi Partiyasından deputat Qüdrət Həsənquliyev, müstəqil namizəd, deputat Zahid Oruc, Milli Dirçəliş Hərəkatı Partiyasından deputat Fərəc Quliyev, Müasir Müsavat Partiyasından Hafiz Hacıyev, “Cəbhəçilərin təşəbbüs qrupu”ndan Razi Nurullayev.
Hazırda MSK daha 3 nəfərin – Vətəndaş və İnkişaf Partiyasından Əli Əliyevin, Demokrat Partiyasından Sərdar Cəlaloğlunun və seçkiyə müstəqil namizəd kimi qatılan, dövlət qeydiyyatı olmayan Ağ Partiyanın başqanı Tural Abbaslının namizədliyinin qeydə alınması üçün təqdim olunmuş seçici imzalarına baxır.
Bir çox müxalif qurum, o cümlədən Müsavat Partiyası və AXCP seçkidə iştirak etmir.
