Maaş artımı sərəncamları
Büdcədən maliyyələşən bəzi təşkilatlarda çalışan işçilərin aylıq vəzifə maaşları martın 1-dən orta hesabla 10 faiz artırılıb. Prezident İlham Əliyevin sərəncamı ilə artım Milli Elmlər Akademiyasının Rəyasət Heyətini və aparatını, Gəncə bölməsinin aparatını; Heydər Əliyev Mərkəzini; Strateji Araşdırmalar Mərkəzini; “Azərbaycan Milli Ensiklopediyası” Elmi Mərkəzini; Azərbaycanda Atatürk Mərkəzini; dövlət arxivlərini və onların filiallarını, rayon (şəhər) dövlət arxivlərini; Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyasının işçi qrupunu; Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən işçi qrupunu; Mədəniyyət və Turizm Nazirliyinin Dövlət Film Fondunu; Elmin İnkişafı Fondunu; Kütləvi İnformasiya Vasitələrinin İnkişafına Dövlət Dəstəyi Fondunu; Qeyri-Hökumət Təşkilatlarına Dövlət Dəstəyi Şurasının Katibliyini; Gənclər Fondunu; Bilik Fondunu; Bakı Beynəlxalq Multikulturalizm Mərkəzini əhatə edir.
Dövlət başçısının digər sərəncamları ilə mədəniyyət, gənclər və idman müəssisələrində; kənd təsərrüfatı, ekologiya və ətraf mühitin mühafizəsi sahələrində; mənzil-kommunal, nəqliyyat və rabitə sahələrində; meliorasiya, su təsərrüfatı və balıqartırma sahələrində çalışan işçilərin Vahid Tarif Cədvəli ilə müəyyən edilmiş aylıq vəzifə (tarif) maaşları martın 1-dən orta hesabla 10 faiz artırılır.
Novator.az xatırladır ki, daha əvvəl səhiyyə müəssisələrində və sosial təminat müəssisələrində; təhsil müəssisələrində (ali təhsil müəssisələri istisna olmaqla); elmi müəssisə və təşkilatlarda çalışan işçilərin Vahid Tarif Cədvəli ilə müəyyən edilmiş aylıq vəzifə (tarif) maaşlarına orta hesabla 10 faizlik artım tətbiq olunub.
