Məhkəmə Əli Kərimlinin dindirilməsinə razılaşmayıb
AXCP sədrinin həbsdə olan müavini Gözəl Bayramlının apellyasiya şikayəti üzrə ilkin baxış olub.
Gözəl Bayramlı 2017-ci il mayın 25-i axşam Gürcüstandan Azərbaycana gələrkən Qazax rayonunda tutulub. Rəsmi məlumata görə, siyasətçinin üstündən bəyan edilməmiş 12 min ABŞ dolları çıxıb. Gözəl Bayramlı isə bu pulun sərhəd-buraxılış məntəqəsində onun çantasına atıldığını söyləyir.
Qaçaqmalçılıqda ittiham olunan Gözəl Bayramlıya cinayət işini Dövlət Sərhəd Xidmətinin İstintaq və Təhqiqat İdarəsi qaldırıb, sonradan istintaqı Baş Prokurorluğun Ağır Cinayətlərə Dair İşlər üzrə İstintaq İdarəsi aparıb.
İşə Qazax Rayon Məhkəməsində baxılıb. 2018-ci il yanvarın 23-də məhkəmə Gözəl Bayramlını 3 il müddətinə azadlıqdan məhrum edib. Onun çantasından çıxdığı iddia olunan 12 min dolların dövlətə keçirilməsi haqda qərar qəbul olunub.
Gözəl Bayramlı hazırda Gəncə İstintaq Təcridxanasında saxlanır.
Qazax Rayon Məhkəməsinin hökmündən verilmiş apellyasiya şikayəti Gəncə Apellyasiya Məhkəməsinin hakimi Teyyub Muxtarovun icraatındadır.
“Amerikanın səsi” xəbər verir ki, fevralın 28-i ilkin baxış zamanı vəkil Elçin Sadıqov Gözəl Bayramlının ev dustaqlığına buraxılması, sərhəd-buraxılış məntəqəsindəki müşahidə kameralarının görüntülərinin alınması və məhkəmədə həmin görüntülərə baxış keçirilməsi, hal şahidlərinin apellyasiya məhkəməsində dindirilməsi barədə vəsatətlər qaldırıb.
Vəkil AXCP sədri Əli Kərimlinin, AXCP-nin Qadınlar Şurasının sədri Solmaz Hüseynovanın, Milli Şuranın üzvü Gültəkin Hacıbəylinin əlavə şahid qismində dindirilməsi barədə də vəsatət verib. Elçin Sadıqov bu vəsatətini belə əsaslandırıb ki, Gözəl Bayramlı 2017-ci il mayın 25-i axşam Qazaxda sərhəd-buraxılış məntəqəsindən Əli Kərimli, Solmaz Hüseynova və Gültəkin Hacıbəyliyə zəng edərək çantasına nəsə atıldığını söyləyib.
Gözəl Bayramlı vəkilinin vəsatətlərini dəstəkləyib.
Dövlət ittihamçısı Qalib Rizvanov vəsatətlərin əleyhinə çıxıb. Hakim vəsatətlərin heç birini təmin etməyib.
İş üzrə məhkəmə baxışı martın 12-nə təyin olunub.
