İqtisadiyyat Nazirliyinin Sahibkarlığa Kömək Milli Fondunun fevralın 28-i İsmayıllı rayonunun Qalınçaq kəndində keçirdiyi işgüzar forumda bölgədə fəaliyyət göstərən sahibkarlıq subyektlərinə 220 min manat güzəştli kredit verilib. Rəsmi məlumata görə, kreditlər heyvandarlıq, taxılçılıq, bağçılıq və s. sahələrin inkişafına yönəldiləcək.

Forumda çıxış edən Sahibkarlığa Kömək Milli Fondunun icraçı direktorunun müavini Arif Vəliməmmədov deyib ki, 2018-ci ilin ötən dövrü ərzində sahibkarlıq subyektləri 19,2 milyon manat güzəştli kredit alıb: “Bugünkü tədbirdə verilən kreditlər də daxil olmaqla indiyədək İsmayıllı rayonunda 500-dək investisiya layihəsinin maliyyələşdirilməsinə 22,8 milyon manat güzəştli kredit ayrılıb”.