Əmlak qeydiyyatında 14,5% artım var
Əmlak Məsələləri Dövlət Komitəsi bildirir ki, elektron çıxarışın tətbiqi təkrar qeydiyyatın tam avtomatlaşdırılması imkanlarını genişləndirib: “Elektron çıxarışı olan vətəndaşların, bələdiyyələrin, torpaq mülkiyyətçilərinin alğı-satqı əməliyyatı zamanı heç bir kağız sənəd təqdim etməsinə ehtiyac qalmır. Alğı-satqı əməliyyatından sonra əmlaka dair çıxarış yeni sahibin “Elektron hökumət” portalındakı şəxsi kabinetinə yerləşdirilir. Nəticədə çıxarış almaq üçün vətəndaşların əlavə olaraq qeydiyyat orqanlarına müraciət etmək zərurəti aradan qaldırılır. Sistemdən artıq 1000 nəfər yararlanıb”.
Rəsmi açıqlamaya görə, ötən il daşınmaz əmlakların təkrar qeydiyyatının sayı 140 minə yaxın olub, bu isə 2016-cı il ilə müqayisədə 12 faiz artım deməkdir: “Daşınmaz əmlakın qeydiyyatı sahəsində xidmətlərin keyfiyyətinin və səmərəliliyinin artması, daha çox insanın rahatlıqla hüquq sahibi olması məqsədilə tətbiq edilən elektron xidmətlərin sayı çoxaldılır. Əmlak Məsələləri Dövlət Komitəsinin 37 elektron xidmətinin 24-ü daşınmaz əmlakın qeydiyyatı sahəsinə aiddir. Təkcə ötən il ərzində bu sahədə 4 yeni elektron xidmət fəaliyyət göstərməyə başlayıb. 2017-ci il ərzində daşınmaz əmlak qeydiyyatının 200 minə yaxın olması bu sahədə tətbiq edilən innovativ üsulların tətbiqinin effektivliyindən, həyata keçirilən işlərin uğurlu olmasından xəbər verir. 2016-cı ilin eyni dövrü ilə müqayisədə bu rəqəm 14,5% artıb. Ümumilikdə isə 280 minə yaxın edilən müraciətin 97%-i öz müsbət həllini tapıb. Qeydiyyatı aparılan əmlakların 38 minə yaxını fərdi yaşayış və bağ evi, 52 mindən çoxu mənzil, 100 minə yaxını torpaq sahəsidir”.
