Demokratik Qüvvələrin Milli Şurası birgə ümumxalq mitinqləri keçirmək təşəbbüsü ilə Müsavat Partiyasına və REAL Hərəkatına müraciət edib.
Müxalifətin bir hissəsinin cəmləşdiyi Milli Şuranın 70-dək üzvü var. 2013-cü ilin iyun ayında yaradılmış quruma tarixçi alim Cəmil Həsənli sədrlik edir. Şuranın fəaliyyətinə rəhbərlik edən Koordinasiya Mərkəzində AXCP sədri Əli Kərimli də yer alır.
Azadliq.info-nun məlumatına görə, Cəmil Həsənlinin birgə mitinqlər müraciətində deyilir: “Milli Şura Azərbaycan hakimiyyətinin növbədənkənar seçki məzhəkəsi ilə bağlı boykot qərarı verib. Qərarı zəruri edən səbəb ölkədə seçki mühitinin olmaması, mətbuatın susdurulması, siyasi repressiyaların davam etməsi, ölkədə 160 nəfər ətrafında siyasi məhbusların olması, İlham Əliyevin qəfil sərəncamı ilə prezident seçkisinin vaxtının heç bir zərurət olmadan 6 ay önə çəkilməsi və sair məsələlərlə bağlı idi. Milli Şura belə seçki oyununda iştirakı rədd edib, hakimiyyətin seçki məzhəkəsini ifşa edəcəyini, başlandığı andan qeyri-legitim məzmun daşıyan saxta seçkinin nəticələrini tanımayacağını, ölkə konstitusiyası və qanunları çərçivəsində bu saxtakarlığa qarşı mübarizə aparacağın bəyan edib.
Təqdirəlayiq haldır ki, Müsavat Partiyası, REAL Hərəkatı və bir sıra digər ictimai-siyasi qurum da seçkiyə qatılmamaq və onun nəticələrini tanımamaq haqqında qərarlar verib. Milli Şura mühüm bir siyasi məsələyə münasibətdə müxalifət düşərgəsində yaranmış mövqe yaxınlığını yüksək qiymətləndirir”.
Cəmil Həsənli bildirir ki, Milli Şuranın Koordinasiya Mərkəzi mart ayından başlayaraq saxta seçkiyə qarşı kütləvi aksiyaların keçirilməsin zəruri sayır, birgə ümumxalq mitinqləri keçirmək çağırışı ilə Müsavat Partiyasına və Respublikaçı Alternativ (REAL) Hərəkatına müraciət edir: “Milli Şura belə hesab edir ki, seçkini boykot edən, hakimiyyətin seçki oyununda iştirak etməyən, onun nəticələrini tanımayan bütün siyasi qüvvələrin və ictimai hərəkatların birgə ümumxalq aksiyası xalqın saxta seçki oyununa qarşı müqavimətinin ifadəsində mühüm addım olacaq”.
2013-cü ilin oktyabrında 5 il müddətinə prezident seçilmiş İlham Əliyevin səlahiyyət müddəti 2018-ci ilin oktyabr ayında başa çatırdı. Bu il oktyabrın 17-də növbəti prezident seçkisi keçirilməli idi. Fevralın 5-də prezident İlham Əliyevin sərəncamı ilə aprelin 11-nə növbədənkənar prezident seçkisi təyin edilib. Belə bir səlahiyyət prezidentə 2016-cı ildə konstitusiyaya edilmiş dəyişikliklə verilib. Başqa bir yenilik prezidentin səlahiyyət müddətinin 5 ildən 7 ilə artırılmasıdır.
Demokratik Qüvvələrin Milli Şurası, Xalq Cəbhəsi, Klassik Xalq Cəbhəsi, Müsavat, Liberal partiyaları, REAL Hərəkatı və başqa bir neçə qurum seçkidə iştirakdan imtina edib.
Azərbaycanda növbədənkənar prezident seçkisi
YAP prezidentliyə namizədini bu həftə elan edəcək
Milli Şura seçkini boykot etməyə qərar verdi
Növbədənkənar seçki: kim necə qiymətləndirir?
MSK növbədənkənar seçkini təyin etdi və planını açıqladı
11 aprel seçkisinə məsul 18 nəfər
Parlament partiyaları seçkiyə necə gedir?
İlham Əliyev 4-cü dəfə prezidentliyə namizəd oldu
Milli Şura beynəlxalq birlikdən nə umur?
Fazil Mustafanın partiyası başqa namizədə dəstək verəcək
Daha bir neçə partiyanın seçki qərarı bəllidir
Seçici siyahılarının dəqiqləşdirilməsi irəli çəkildi
Sərdar Cəlaloğlunun sənədləri hazırdır
Rəsmi iddiaçıların sayı 15-ə yüksəlib
