Dənizdə çimməyin sağlamlığa ziyanı da var. Novator.az-ın məlumatına görə, Böyük Britaniyanın bir qrup alimi bu qənaətə gəlib.

Alimlərin apardığı tədqiqatın nəticəsi “İnternational Journal of Epidemiology” nəşrində dərc olunub.

İngiltərəli alimlər tədqiqatı həm öz ölkələrində, həm də ABŞ, Avstraliya, Yeni Zelandiya, Danimarka və Norveçdə aparıblar. Onlar dənizdə üzməklə insan səhhətində problemin yaranması və ya güclənməsi prosesi arasında əlaqəni öyrənmək üçün 19 hesabatı araşdırıblar. Ümumilikdə alimlər 120 min adamın səhhəti haqda məlumatı analiz ediblər.

Tədqiqat zamanı aydınlaşıb ki, dənizdə tez-tez çimən insanların eşitmə qabiliyyətində digərləri ilə nisbətdə 2 dəfə çox pozuntu olur.

Tədqiqata görə, dənizdə çox çimmək mədə-bağırsaq xəstəliyi riskini 29 faiz artırır. Alimlər bunu əsasən çirkab suların, yoluxucu mikroorqanizmlərin dənizə axıdılması ilə əlaqələndirilər.

Səidə Hüseynova