Rusiya prezidentliyinə namizədlərin ən cavanı 36, ən qocası 71 yaşdadır. Onların 3-ü subay, 5-i evlidir.

Novator.az bildirir ki, dövlət başçısı postuna ən gənc iddiaçı Vətəndaş Platforması Partiyasından Kseniya Sobçakdır. Onun 36 yaşı var.

Rusiya Kommunistləri Partiyasının namizədi Maksim Suraykin 39 yaşdadır.

Liberal Demokrat Partiyasının namizədi Vladimir Jirinovski marafonun ağsaqqalıdır: 71 yaş.

Qalan 5 namizəd 55 yaşı keçib. Səkkizliyin orta yaşı 56-dır.

Müstəqil namizəd, prezident Vladimir Putin, Vladimir Jirinovski və Maksim Suraykin nikahda deyillər. Maksim Suraykindən başqa hamının övladı var.

Seçki stajına görə Vladimir Jirinovski öndədir. İndiyədək o, 5 prezident seçkisində iştirak edib.

Vladimir Putin 3, “Yabloko” Partiyasının namizədi Qriqori Yavlinski 2 prezident seçkisinə qatılıb.

Digərləri ilk dəfə prezidentlik yarışında qüvvəsini sınayır.

Rusiya Ümumxalq İttifaqı Partiyasının namizədi Sergey Baburin və Vladimir Jirinovski Qazaxıstanda, Qriqori Yavlinski Ukraynada doğulub.

Qalan namizədlərin 3-ü Moskvanın, 2-si Sankt-Peterburqun yetirməsidir.

2011-2016-cı illərə aid rəsmi hesabata görə, ən çox gəlir əldə edən namizəd Kseniya Sobçak olub: 403,9 milyon rubl.

Ən az gəlir əldə edən namizəd Sergey Baburindir: 11,4 milyon rubl.

Prezident seçkisi martın 18-də keçiriləcək.