Xocalının əhalisi rəsmi statistikada
Novator.az Xocalı rayonunun əhalisinin sayının 1990-cı illərdən bəri necə dəyişməsinə nəzər salıb.
Xocalı rayonu 1991-ci il noyabrın 26-da Azərbaycan parlamentinin Dağlıq Qarabağ Muxtar Vilayətini ləğv edən qərarı ilə yaradılıb. Həmin qərara əsasən, Əsgəran rayonunun ərazisi Xocalı şəhəri mərkəz olmaqla Xocalı rayonunun tərkibinə verilib.
O vaxt rayonun 50 kəndi, 2 qəsəbəsi olub.
1992-ci il fevralın 25-dən 26-na keçən gecə ermənilər Xocalı şəhərini işğal edərək 613 nəfəri qətlə yetirib.
Dövlət Statistika Komitəsinin 1995-ci il hesabatında Xocalı rayonunun əhalisinin sayı 23,6 min nəfər göstərilib.
Rəsmi bilgiyə görə, 2000-ci ildə Xocalı əhalisinin sayı 23,9 min nəfərə, 2005-ci ildə 24,9 min nəfərə, 2010-cu ildə 26,2 min nəfərə çatıb.
Sonrakı illərin göstəriciləri belədir:
2011-ci il – 26,5 min nəfər
2012-ci il – 26,7 min nəfər
2013-cü il – 27 min nəfər
2014-cü il – 27,2 min nəfər
2015-ci il – 27,5 min nəfər
2016-cı il – 27,8 min nəfər
2017-ci il – 28 min nəfər.
2018-ci ilin əvvəlinə Xocalı rayonunun 28,3 min nəfər əhalisi olub.
1988-ci ilin fevralında Azərbaycanın Əsgəran, Hadrut, Mardakert, Martuni, Şuşa rayonları və Stepanakert şəhərindən ibarət Dağlıq Qarabağ Muxtar Vilayətinin Ermənistana verilməsi tələbi ilə separatçı hərəkat, hərbi təcavüz başlayıb.
1991-ci il sentyabrın 2-də ermənilər Dağlıq Qarabağı “müstəqil dövlət” elan edib, işğalçı müharibə alovlanıb, Dağlıq Qarabağda azərbaycanlıların yaşadığı kəndlər, eləcə də Xocalı şəhəri ermənilərin əlinə keçib.
1992-ci il mayın 8-9-da Şuşa şəhərinin işğalı ilə Azərbaycan Dağlıq Qarabağa nəzarəti tam itirib.
Müharibənin sonrakı mərhələsində Dağlıq Qarabağ ətrafındakı Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları işğal edilib.
