Rusiyanın Mərkəzi Seçki Komissiyası prezidentliyə namizədlərin fevralın 20-dək kampaniyaya ümumilikdə 781 milyon rubldan bir qədər çox sərf etdiyini açıqlayıb (1 milyon rubl 30 min manatdır).

Novator.az xəbər verir ki, seçkiqabağı kampaniyaya ən çox Liberal Demokrat Partiyasının namizədi Vladimir Jirinovski pul qoyub. Onun 210 milyon rubla yaxın xərci çıxıb.

Müstəqil namizəd, prezident Vladimir Putin kampaniyaya 196 milyon rubldan artıq vəsait xərcləyib.

Kommunist Partiyasının namizədi Pavel Qrudinin 150 milyon rubla yaxın, Vətəndaş Platforması Partiyasının namizədi Kseniya Sobçak 93 milyon rubla yaxın, Yüksəliş Partiyasının namizədi Boris Titov 80 milyon rubl, “Yabloko” Partiyasının namizədi Qriqori Yavlinski 45 milyon rubldan bir az çox, Rusiya Ümumxalq İttifaqı Partiyasının namizədi Sergey Baburin 6,6 milyon rubl, Rusiya Kommunistləri Partiyasının namizədi  Maksim Suraykin 1,1 milyon rubla yaxın xərc çəkib.

Rusiyada prezident seçkisi martın 18-də keçiriləcək.