Uşaq ölümünün yeni statistikası
BMT-nin Uşaq Fondu (YUNİSEF) körpə ölümləri hesabatı yayıb. Novator.az-ın məlumatına görə, hesabatda hər il bircə ay belə yaşamamış 2 milyon 600 min körpənin öldüyü bildirilir.
YUNİSEF analitiklərinin fikrincə, uşaq ölümlərinin 80%-i üç səbəbdən baş verir: vaxtından əvvəl doğuş, doğuş zamanı ağırlaşma, pnevmoniya və sepsis kimi yoluxucu xəstəliklər.
Hesabata əsasən, yeni doğulmuş körpələr arasında ən çox ölüm halı Pakistanda qeydə alınır: bu ölkədə hər il 1000 körpədən 46-sı ölür.
Yeni doğulmuş körpələr üçün ən təhlükəli ölkələr siyahısında sonrakı yerlərdə Cənubi Afrika Respublikası və Əfqanıstan gəlir.
YUNİSEF-in hesabatına əsasən, körpə ölümü üzrə ən aşağı göstərici Yaponiyada qeydə alınır. Bu ölkədə yeni doğulan 1111 körpədən 1-nin öldüyü vurğulanır.
Ən az körpə ölümü göstəricisi olan ölkələr arasında sonrakı yerlərdə İslandiya və Sinqapur qərarlaşıb.
Hesabata görə, yeni doğulan uşaqlar arasında ən yüksək ölüm göstəricisi olan 10 ölkədən 8-i Afrikada, Saxaradan cənubdakı bölgədədir.
Səidə Hüseynova
