Abbas Ələsgərovun nekroloqu
Dövlət Şəhərsalma və Arxitektura Komitəsinin sədri Abbas Ələsgərov fevralın 18-də vəfat edib. Rəsmi nekroloqda bildirilir ki, Abbas Ələsgərov 1937-ci il dekabr ayının 13-də Bakı şəhərində anadan olub. 1963-cü ildə Azərbaycan Politexnik İnstitutunun nəqliyyat fakültəsini mühəndis-inşaatçı ixtisası üzrə bitirib.
Əmək fəaliyyətinə hələ tələbə ikən, 1959-cu ildə “Xalqtəsərrüfatmaştəchizatsatış” idarəsində mühəndis kimi başlayan Abbas Ələsgərov 1960-1961-ci illərdə ixtisaslaşdırılmış “Sənayetikintimexanikləşdirmə” trestində texnik, usta və mühəndis, 1961-1962-ci illərdə Kommunal Təsərrüfat Nazirliyinin əsaslı tikinti şöbəsində mühəndis işləyib, 1962-1976-cı illərdə Sənaye Tikinti Nazirliyində tikintidə yeni texnikanı tətbiq edən “Texniki tikinti təşkilatı” trestində böyük mühəndis, qrup rəhbəri, şöbə müdiri və baş mühəndis, 1976-1977-ci illərdə Sənaye Tikinti Nazirliyinin 4 nömrəli trestinin tikinti idarəsində baş mühəndis vəzifələrində çalışıb. 1977-1982-ci illərdə SSRİ Dövlət Tikinti və Arxitektura Komitəsinin “Azərdövlətsənayelayihə” İnstitutunda baş mühəndisin müavini, 1982-1983-cü illərdə Bakı Baş Tikinti İdarəsinin layihə konstruktor-texnoloji bürosunun, 1983-2007-ci illərdə Bakı Dövlət Layihə İnstitutunun direktoru vəzifələrini tutub.
Abbas Ələsgərov 2007-ci ildən ömrünün sonunadək Dövlət Şəhərsalma və Arxitektura Komitəsinin sədri olub, eyni zamanda 2007-2012-ci illərdə Azərbaycan Memarlar İttifaqına sədrlik edib.
Abbas Ələsgərov əməkdar mühəndis və əməkdar memar fəxri adlarına layiq görülüb, “Şöhrət” və 2-ci dərəcəli “Vətənə xidmətə görə” ordenləri ilə təltif edilib.
Nekroloq prezident İlham Əliyev, birinci vitse-prezident Mehriban Əliyeva, baş nazir Artur Rasizadə, Milli Məclisin sədri Oqtay Əsədov, Prezident Administrasiyasının rəhbəri Ramiz Mehdiyev və başqa rəsmilərin adından yayılıb.
