Məhbus jurnalist Əfqan Muxtarlı əzizlərinin qırx mərasimində iştirak üçün fevralın 8-də azadlığa buraxılıb. APA-nın məlumatına görə, Əfqan Muxtarlıya 2 gün icazə verilib.

Əfqan Muxtarlı Şəki İstintaq Təcridxanasında saxlanır. O, ötən ilin mayında tutulub. Bu il yanvarın 12-də Balakən Rayon Məhkəməsi onu dövlət sərhədini qanunsuz keçməkdə, hakimiyyət nümayəndəsinə zor tətbiq etməkdə və qaçaqmalçılıqda təqsirli bilərək 6 il müddətinə azadlıqdan məhrum edib.

Ötən il dekabrın 31-də Əfqan Muxtarlının bacısı Nuranə Muxtarlı, onun qızı Milay və jurnalistin qardaşı Ramazan Muxtarlının övladı Fatimə Zaqatala şəhərində dəm qazından boğularaq ölüblər.

Əfqan Muxtarlının yaxınlarının dəfn mərasimində iştirak etmək istəyi baş tutmamışdı.