Serj Sərkisyan yerini də vermir
Ermənistanda prezidentin və hökumətin ofisləri yerlərini dəyişir. Novator.az-ın məlumatına görə, aprel ayında seçiləcək yeni prezident hazırda Nazirlər Kabineti yerləşən binada fəaliyyət göstərəcək. Baş nazir isə indiki Prezident Aparatında əyləşəcək.
Plana əsasən, Prezident Aparatı işçilərinin sayı 180 nəfərdən çox ola bilməz. Nazirlər Kabineti Aparatı işçilərinin maksimal sayı isə 600 nəfər nəzərdə tutulur.
Aprelin 9-da hakim Respublika Partiyasının sədri Serj Sərkisyanın Ermənistan prezidenti postunda səlahiyyət müddəti başa çatır. Həmin gün ölkə tam parlament idarə üsuluna keçəcək, icra hakimiyyətinə baş nazir rəhbərlik edəcək.
Yalnız dövlət başçısı funksiyası daşıyan prezidenti isə parlament 1-10 mart aralığında seçməlidir. Respublika Partiyasından prezidentliyə Ermənistanın Böyük Britaniyada səfiri Armen Sərkisyan namizəd göstərilib.
7 illiyə seçiləcək yeni prezident səlahiyyətinin icrasına aprelin 9-da başlayacaq. Baş nazir aprelin 17-si parlamentdə seçiləcək.
2008-ci ildən prezident olan Serj Sərkisyanın baş nazir kürsüsündə əyləşəcəyi gözlənir. Ermənistan parlamentinin 105 deputatının 58-i Respublika Partiyasının üzvüdür. Hökumət ortağı olan Daşnaksütun Partiyası 7 mandatla təmsil olunur.
