Fevralın 1-də Milli Məclis “Peşə təhsili haqqında” qanunu ilk oxunuşda qəbul edib. Sənəd peşə təhsili sahəsində dövlət siyasətinin prinsiplərini, peşə təhsili və təlimi sisteminin təşkilati-hüquqi və iqtisadi əsaslarını müəyyənləşdirir.

Novator.az bildirir ki, layihədə peşə təhsili sisteminin quruluşu belə verilir: ilk peşə təhsili; texniki peşə təhsili; yüksək texniki peşə təhsili.

Peşə təhsili müəssisələrinin üç növü nəzərdə tutulur: peşə məktəbi; peşə liseyi; peşə təhsil mərkəzi.

Təhsil müddəti bu qruplara görə müəyyənləşdirilir: ümumi orta təhsil bazasından qəbul olunmuş və ilk peşə təhsili alanlar üçün təşkil edilən qruplarda – 1 il, texniki peşə təhsili alanlar üçün təşkil edilən qruplarda – 2 il; tam orta təhsil bazasından qəbul olunmuş və ilk peşə təhsili alanlar üçün təşkil edilən qruplarda – 6 ay, texniki peşə təhsili alanlar üçün təşkil edilən qruplarda – 1 il; ümumi orta təhsil bazasından qəbul olunmuş və texniki peşə təhsili ilə yanaşı tam orta təhsil alanlar üçün təşkil edilən qruplarda – 3 il; ümumi orta təhsil bazasından qəbul olunmuş və yüksək texniki peşə təhsili alanlar üçün təşkil edilən qruplarda – 4 il; tam orta təhsil bazasından qəbul olunmuş və yüksək texniki peşə təhsili alanlar üçün təşkil edilən qruplarda – 3 il.

Ümumi orta və tam orta təhsil səviyyəsini bitirib, istehsalatda və ya digər iş sahələrində müəyyən nəzəri və praktiki peşə bacarıqları qazanmış şəxslər üçün işəgötürənlərin və fərdlərin öz vəsaitləri hesabına sifarişlər əsasında həmin və ya digər peşənin öyrənilməsi, ixtisasının artırılması və yenidən hazırlanması üzrə kurslarda təhsil müddəti 6 aya qədərdir.

Ali təhsil almış şəxslərin də peşə təhsil almaq hüququ var.