Qida Təhlükəsizliyi Agentliyinin maddi-texniki bazasını gücləndirən sərəncam imzalanıb. Novator.az-ın məlumatına görə, prezident İlham Əliyevin imzaladığı sənəd bəzi obyektlərin İqtisadiyyat Nazirliyinin, Kənd Təsərrüfatı Nazirliyinin və Səhiyyə Nazirliyinin balansından agentliyin balansına verilməsini nəzərdə tutur.

26 yanvar sərəncamında Nazirlər Kabinetinə iki ay müddətində Əmlak Məsələləri Dövlət Komitəsi ilə birlikdə nəzərdə tutulan dövlət əmlakının agentliyin balansına verilməsini təmin etmək tapşırılıb. Nazirlər Kabineti İqtisadiyyat Nazirliyindən, Kənd Təsərrüfatı Nazirliyindən və Səhiyyə Nazirliyindən agentliyə keçəcək ştat sayının və 2018-ci ilin dövlət büdcəsində nəzərdə tutulmuş vəsaitin agentliyə ötürülməsi üçün zəruri tədbirlər də görməlidir.

Dövlət başçısının 13 noyabr 2017-ci il fərmanı ilə Qida Təhlükəsizliyi Agentliyinin əsasnaməsi və strukturu təsdiq edilib. Agentlik qida məhsullarının təhlükəsizliyinə dair normativ tənzimləməni, risklərin təhlilini, qida məhsullarının və onları qablaşdırma materiallarının dövlət qeydiyyatına alınmasını, xarici ölkələrə ixrac edilən qida məhsullarına qida təhlükəsizliyi sertifikatının verilməsini, qida məhsullarının istehsalı, tədarükü, qablaşdırılması, saxlanması, daşınması, dövriyyəsi, ictimai iaşə və xidmət sahələrində istifadəsi, utilizasiyası və məhv edilməsi də daxil olmaqla qida zəncirinin bütün mərhələlərində qida təhlükəsizliyinə və qida məhsulları istehlakçılarının hüquqlarının müdafiəsinə dövlət nəzarətini, habelə qeyd olunan sahələrdə dövlət siyasətini və tənzimləməsini həyata keçirən mərkəzi icra hakimiyyəti orqanıdır.

Qida Təhlükəsizliyi Agentliyi Aparatının işçilərinin say həddi 75 ştat vahidi müəyyən olunub.

2017-ci il dekabrın 25-də Qoşqar İlahi oğlu Təhməzli Qida Təhlükəsizliyi Agentliyinin sədri təyin edilib.

 Səhiyyə Nazirliyinin balansından verilən laboratoriyalar

 Kənd Təsərrüfatı Nazirliyinin balansından verilən laboratoriyalar

 İqtisadiyyat Nazirliyinin balansından verilən laboratoriyalar