Rusiyalılar kimə pərəstiş edir?
Ümumrusiya İctimai Rəyi Öyrənmə Mərkəzi əhalinin 20-ci əsrin yerli məşhurlarından kimə pərəstiş etdiyini araşdırıb. Novator.az-ın məlumatına görə, sorğunun yanvarın 23-də açıqlanan nəticələrinə görə, rusiyalıların 20-ci əsrin yerli nümayəndələri arasında ən çox pərəstiş etdikləri şəxs təyyarəçi-kosmonavt Yuri Qaqarindir. Respondentlərin 44%-i Yuri Qaqarinin pərəstişkarı olduğunu bildirib.
İkinci yerdə musiqiçi, aktyor Vladimir Vısotski (28%), üçüncü yerdə marşal Georgi Jukov (27%) gəlir.
Sorğuya qatılanların 22%-i İosif Stalinə, 14%-i yazıçı Aleksandr Soljenitsına, 13%-i yazıçı Lev Tolstoya pərəstiş etdiyini vurğulayıb.
Respondentlərin ən çox pərəstiş etdiyi şəxslər arasında sonrakı yerlərdə Böyük Teatrın baletmeysteri Maya Plisetskaya (13%), bolşevik inqilabının lideri Vladimir Lenin (12%), fizik, akademik Andrey Saxarov (11%), veteran fiqurlu konkisürən, Dövlət Dumasının deputatı İrina Rodnina (10%) qərarlaşıb.
Rusiyalıların pərəstiş etdiyi 20-ci əsrin nümayəndələri siyahısında Mixail Şoloxov, Mixail Bulqakov, Anton Çexov, Andrey Mironov, Lev Yaşin, Fyodor Şalyapin, İosif Brodski, Lyubov Orlova, Dmitri Şostakoviç, Vasili Çapayev, Mixail Qorbaçov və İlya Repin də var.
Səidə Hüseynova
