Dağlıq Qarabağda boşananlar artıb
İşğalçı Dağlıq Qarabağ rejimində 2017-ci ilin nikah və boşanma hesabatı açıqlanıb. Novator.az-ın məlumatına görə, hesabatda bildirilir ki, ötən il Dağlıq Qarabağda 961 nikah bağlanıb. 2016-cı ildə 934 nikah rəsmiləşmişdi.
Hesabatda ötən il nikaha daxil olmuş kişilərin orta yaşı 28, qadınların orta yaşı 23 göstərilir.
2017-ci ildə Dağlıq Qarabağda 227 boşanma aktı qeydə alınıb. 2016-cı ildə 168 boşanma olmuşdu.
Boşananların orta yaşının 33 olduğu bildirilir, nikahın pozulması üçün ən çox qadınların müraciət etdiyi qeyd olunur.
Boşanan cütlüklərdən 153-nün yetkinlik yaşına çatmayan uşaqları var.
2017-ci ildə işğalçı rejimdə nikah bağlanması üçün 23 əcnəbiyə icazə verilib.
1988-ci ilin fevral ayında ermənilər Azərbaycanın Dağlıq Qarabağ Muxtar Vilayətinin Ermənistanın tərkibinə verilməsi tələbi ilə separatçı hərəkata başlayıb. Bu hərəkat getdikcə vüsət alaraq Ermənistanın Azərbaycana açıq hərbi təcavüzünə çevrilib.
1991-ci il sentyabrın 2-də ermənilər Dağlıq Qarabağı “müstəqil dövlət” elan edib. Bunun ardınca işğalçı müharibə alovlanıb. 1994-cü ilin may ayında elan olunan atəşkəsə qədər Ermənistan Dağlıq Qarabağı və onun ətrafındakı 7 rayonu işğal edib.
Səidə Hüseynova
