Yanvarın 18-də Avropa İnsan Hüquqları Məhkəməsi azərbaycanlı jurnalist Müşfiq Hüseynovun hüquqlarının pozulması barədə şikayəti təmin edib.

“Turan”ın məlumatına görə, məhkəmə jurnalistin Avropa İnsan Hüquqları Konvensiyası ilə təsbit olunmuş azadlıq və toxunulmazlıq, eyni zamanda ədalətli məhkəmə araşdırması hüququnun pozulduğunu tanıyıb və buna görə Azərbaycan dövlətinin Müşfiq Hüseynova 4000 avro məbləğində təzminat ödəməsi barədə qərar qəbul edib.

Müşfiq Hüseynov 2007-ci ilin iyulunda “Bizim Yol” qəzetinin müxbiri kimi tutulub. 2008-ci ilin yanvarında rüşvət almaqda təqsirli bilinərək 6 il müddətinə azadlıqdan məhrum edilib. Sonradan Bakı Apellyasiya Məhkəməsi onun cəzasını 1 il azaldıb. O, 2009-cu ilin dekabrında prezident İlham Əliyevin imzaladığı sərəncamla əfv olunub.

Yerli məhkəmələrdə jurnalistin hüquqlarını mərhum vəkil İsaxan Aşurov müdafiə edib.

Müşfiq Hüseynov barəsində Azərbaycanda çıxarılan qərarlardan Avropa Məhkəməsinə şikayət 2008-ci ildə göndərilib. Bu iş üzrə Avropa Məhkəməsi ilə kommunikasiya 2016-cı ildə başa çatıb. Avropa Məhkəməsində jurnalistin hüquqlarını Samirə Ağayeva müdafiə edib.