Hegemon büdrəsə də…
İngiltərə milli futbol çempionatında 23-cü tur flaqman “Mançester Siti”nin ilk məğlubiyyəti ilə əlamətdar olub. Mançesterlilər səfərdə “Liverpul”a 3:4 hesabı ilə uduzublar.
Bununla belə, “Mançester Siti” 62 xalla şəriksiz liderdir və izləyicilərini 15 xal qabaqlayır. Novator.az-ın məlumatına görə, 3 klub – “Mançester Yunayted” (bir oyun az keçirib), “Liverpul” və “Çelsi” 47 xal toplayıb.
İspaniya çempionatında ilk dövrə başa çatıb. Lider “Barselona” 19-cu turda xal sayını 51-ə yüksəldib. “Atletiko”nun 42, “Valensiya”nın 40 xalı var. Ehtiyatda bir oyunu olan “Real” 32 xal yığıb.
Fransada 20 turdan sonra PSJ 53 xalla zirvədədir. Ən yaxın izləyicilərin – “Monako” və “Lion”un 42 xalı var.
Almaniyada 18 turun ardından “Bavariya” 44 xalla önə çıxıb. “Leypsiq” 31, “Şalke” 30 xal toplayıb.
Qısa fasilə götürmüş İtaliya çempionatında 20 turdan sonra “Napoli” 51 xalla liderlik edir. Lideri izləyən “Yuventus” 50 xal yığıb. “İnter”in 42 xalı var.
