Alpinistlərin axtarışı: əməliyyat müşavirəsində nələr deyildi?
Qubanın dağlıq ərazisində itkin düşmüş alpinistlərin axtarışları davam edir. Yanvarın 3-də Fövqəladə Hallar Nazirliyində bununla bağlı əməliyyat müşavirəsi keçirilib. Nazir müavini general-leytenant Etibar Mirzəyevin sədrliyi ilə keçirilən əməliyyat müşavirəsinə axtarış-xilasetmə işlərinə cəlb olunmuş qurumların rəhbərləri qatılıb.
2017-ci il dekabrın 23-də Quba rayonunun Xınalıq kəndindən Tufandağ istiqamətində yürüşə çıxmış “Gilavar” hava və ekstrim idman klubunun üzvləri Fəridə Cəbrayılzadə, Babur Hüseynov və Namin Bünyatzadə itkin düşüb.
3 yanvar müşavirəsində alpinistlərin axtarışları ilə əlaqədar görülən işlər təhlil olunub, növbəti günlərdə görüləcək işlər nəzərdən keçirilib və müvafiq göstərişlər verilib.
Qeyd olunub ki, son günlər meteoroloji şəraitin kəskin pisləşməsi (1,4 metrədək qarın yağması, temperaturun aşağı enməsi, güclü küləyin əsməsi, görüntü məsafəsinin azalması) nəzərə alınaraq axtarış-xilasetmə tədbirləri məhdudiyyətlə, lakin fasiləsiz aparılır.
Rəsmi məlumata görə, axtarış-xilasetmə işlərində peşəkar xilasedicilərdən ibarət dəstələr, Ekologiya və Təbii Sərvətlər Nazirliyinin əməkdaşları, peşəkar alpinistlərdən və yerli sakinlərdən ibarət könüllülər iştirak edir. Meteoroloji şəraitdən asılı olaraq Fövqəladə Hallar Nazirliyinin helikopteri əməliyyata cəlb olunur.
Əməliyyat müşavirəsində qeyd olunub ki, bəzi xəbər saytları həqiqəti əks etdirməyən, xüsusilə də əməliyyatda iştirak edən dövlət qurumlarının fəaliyyəti ilə bağlı doğru olmayan məlumatlar yayır. Fövqəladə Hallar Nazirliyi kütləvi informasiya vasitələrini, ictimaiyyət nümayəndələrini, sosial şəbəkələrin istifadəçilərini rəsmi olmayan, dəqiqləşdirilməmiş məlumatlardan istifadə etməməyə çağırır və bu cür məlumat yayanlara diqqətli olmağı, yaranmış vəziyyətə anlayışla yanaşmağı tövsiyə edir.
