Əmanətlərin Sığortalanması Fondu açıqlama yayıb. Qeyd olunur ki, Maliyyə Bazarlarına Nəzarət Palatasının 22 dekabr 2017-ci il qərarı ilə “Dəmirbank” ASC-nin lisenziyası ləğv edilib: “Əmanətlərin Sığortalanması Fondunun Himayəçilik Şurasının qərarına əsasən, “Dəmirbank” ASC-də qorunan əmanətlər üzrə kompensasiyaların verilməsi üçün agent-bank qismində “Kapitalbank” ASC seçilib.

Kompensasiyaların verilməsinə 1 fevral 2018-ci ildən “Kapitalbank” ASC-nin filial şəbəkəsi vasitəsilə başlanacaq”.

Maksimal illik faiz dərəcəsi milli valyuta üzrə 15%, xarici valyuta üzrə 3% həddində olan qorunan əmanətlər məbləğindən asılı olmayaraq 3 il müddətində tam sığortalanır.

30 sentyabr 2017-ci il hesabatına görə, bankda 66 min 286 nəfər əmanətçinin 81,5 milyon manat kompensasiya olunan əmanəti olub. Bankın lisenziyası ləğv edildikdən sonra qorunan əmanətlərin həcmi ilə bağlı ilkin qiymətləndirmə aparılıb: kompensasiya olunan əmanətlərin həcmi hesablanmış faizlərlə birlikdə 55 min 213 nəfər üzrə 63,5 milyon manat təşkil edir. Əmanətçilərin 52 min 732 nəfərinin əmanəti 1000 manatdan aşağıdır.

Bankda kompensasiya olunmayan əmanətlərin həcmi 28,3 milyon manat təşkil edir.

“Dəmirbank” 6 oktyabr 1989-cu  ildə yaranıb, “Azərdəmiryolbank” adı ilə fəaliyyət göstərib. Bank 16 oktyabr 2009-cu ildən fəaliyyətini “Dəmirbank” adı ilə həyata keçirib.