Əhalinin gəlir-çıxarı: yeni rəqəmlər
Yanvar-oktyabr aylarında Azərbaycan əhalisinin sayı 73 min 360 nəfər artaraq 9 milyon 883 min 341 nəfərə çatıb.
Noyabr ayının 1-nə ölkənin bank və bank olmayan kredit təşkilatlarının kredit portfeli milli valyuta ekvivalentində 12 milyard 152,2 milyon manat təşkil edib. Ümumi kredit portfelinin 15,5 faizinin ödəmə vaxtı keçib.
Əhalinin banklardakı əmanətlərinin milli valyuta ekvivalentində məbləği noyabr ayının 1-nə 7 milyard 280,1 milyon manat olub.
Dövlət Statistika Komitəsi bu göstəriciləri dekabrın 14-də açıqlayıb. Novator.az-ın məlumatına görə, rəsmi hesabatda qeyd olunur ki, dekabr ayının 1-nə kənd təsərrüfatının ümumi məhsulu 2016-cı ilin yanvar-noyabr ayları ilə müqayisədə 4,2 faiz, o cümlədən heyvandarlıq məhsullarının istehsalı 2,8 faiz, bitkiçilik məhsullarının istehsalı 5,9 faiz artıb.
11 ayda nəqliyyat sektorunda yük daşınmasının 1,8 faiz, sərnişin daşınmasının 2,3 faiz artdığı bildirilir.
Hesabata görə, informasiya və rabitə xidmətlərinin həcmi dəyər ifadəsində 5,9 faiz artıb, bu sahədə əldə edilmiş gəlirin 81,1 faizi qeyri-dövlət sektorunun payına düşüb.
Yanvar-noyabr aylarında əhalinin gəlirləri nominal ifadədə 8,2 faiz artaraq 43 milyard 389,9 milyon manata çatıb.
11 ayda dövlət büdcəsinə 14 milyard 749,3 milyon manat vəsait daxil olub, büdcədən 15 milyard 463,1 milyon manat vəsait xərclənib, büdcənin icrasında 713,8 milyon manatlıq kəsir yaranıb.
