Heyvanla adam kimi davranmaq qanunu
Rusiya parlamentinin aşağı palatası olan Dövlət Duması heyvanlarla qəddar davranışa görə cəzaları sərtləşdirən qanun qəbul edib. Novator.az bildirir ki, dekabrın 13-də qəbul olunan qanun heyvanlarla qəddar davranmağa görə azadlıqdan məhrumetmə cəzasının maksimal həddini 6 aydan 3 ilə artırır.
Bir qrup şəxsin heyvanlarla qəddar davranışına və bu əməlin planlı şəkildə törədilməsinə görə maksimal həbs cəzası 5 ilə qaldırılır. Hazırda maksimum cəza 2 ildir.
Uşaqların gözü qarşısında heyvanlara əzab verilməsi və qəddar üsullardan istifadə olunması 5 ilədək azadlıqdan məhrumetməyə gətirəcək.
Bir neçə heyvanın öldürülməsi və heyvanlara əzab verilməsinin internetdə nümayiş olunmasına da 5 ilədək həbs cəzası düşür.
Qanuna görə, vəhşi heyvanların və su bioresurslarının qanunsuz əldə olunması, saxlanması, daşınması, göndərilməsi və satılması 5 ilədək azadlıqdan məhrumetmə cəzası, eyni zamanda 2 milyon rubladək cərimələnmə ilə nəticələnəcək.
