Məhbub Zülfüqarov azadlığa çıxıb
İctimai fəal, “Gündəm-xəbər” qəzetinin bölgə müxbiri Məhbub Zülfüqarov dekabrın 6-da azadlığa çıxıb. Məlumatı hüquq müdafiəçisi Oqtay Gülalıyev yayıb.
Məhbub Zülfüqarov İmişlidə yaşayır. İmişli Rayon Məhkəməsi onu “Azərbaycan Standartlaşdırma İnstitutu” publik hüquqi şəxsin cənub ərazi idarəsinin direktoru Saleh Səmədovun iddiası əsasında Cinayət Məcəlləsinin 147.2-ci (ağır və ya xüsusilə ağır cinayətdə ittiham etməklə böhtan atma) maddəsi ilə təqsirli bilərək 5 ay müddətinə azadlıqdan məhrum etmişdi.
Məhbub Zülfuqarov cəzasını 14 saylı Cəzaçəkmə Müəssisəsində çəkirdi. Onun azadlığa çıxması həbs müddətinin başa çatması ilə əlaqədardır.
Məhbub Zülfüqarov ittihamı əsassız, məhkəmə qərarını ədalətsiz saydığını vurğulamışdı.
“Turan” agentliyi xəbər verir ki, Məhbub Zülfüqarovun adı bir qrup hüquq müdafiəçisinin tərtib etdiyi siyahıda siyasi məhbus kimi keçirdi.
