“Təcrübə qazanan təkcə “Qarabağ” olmadı”
“Qarabağ”ın timsalında Azərbaycan futbolunun UEFA Çempionlar Liqasının qrup mərhələsində debütünü uğurlu sayıram”. Tanınmış futbol icmalçısı Rövşən Binnətli Novator.az-a açıqlamasında belə deyib.
Çempionlar Liqasının C qrupunda yarışan “Qarabağ” komandası 2 xalla dördüncü pilləni tutub. Ağdamlılar İngiltərənin “Çelsi” klubuna 0:4 və 0:6, İtaliya “Roma”sına 1:2 və 0:1 hesabı ilə uduzdu, İspaniyanın “Atletiko” klubu ilə xalları böldü (0:0, 1:1).
Rövşən Binnətli qeyd edib ki, “Qarabağ”ın qazandığı 2 xal az görünə bilər, amma bu xalların çəkisi çox ağırdır: “Gizlətməyin yeri yoxdur – Ağdam klubunun turniri xalsız bitirəcəyini düşünənlər çox idi. “Qarabağ” yalnız “Çelsi” ilə oyunlarda üzücü məqamlar yaşadı və bu, nəticədə də əksini tapdı – 0:10. Digər 4 görüşdə isə komandamız 2 qol vurub öz qapısından 4 top buraxdı. Bu isə debütant üçün olduqca qənaətbəxş nəticədir.
Qitənin 32 ən güclü klubu sırasına çıxan Azərbaycan çempionu hazırda “Benfika” və “Olimpiakos”dan öndədir, yekunda isə qabaqlayacağı komandaların sırasına daha bir neçəsi qoşula bilər.
Çempionlar Liqasında iştirak böyük təcrübə oldu. Lakin təcrübə qazanan təkcə “Qarabağ” olmadı – bu debütdən ümumən futbolumuz böyük fayda gördü”.
Novator.az bildirir ki, ələmə raundlarında “Qarabağ” Gürcüstanın “Samtredia” (5:0, 1:0), Moldovanın “Şerif” (0:0, 2:1), Danimarkanın “Kopenhagen” komandalarını (1:0, 1:2) turnirdən kənarlaşdırıb. Beləliklə, 12 oyunda Ağdam klubu 4 qələbə qazanıb, 3 heç-heçəyə nail olub, 5 yol uduzub. Topların fərqi 12-17-dir.
